მას, განათებულს ივერიის მზით
მას, განათებულს ივერიის უმხურვალეს მზით,
მრავალ ომებში თავზე რა არ გადახდომია,
როცა ჰკითხავენ: მეთაურო, საით, რომელ გზით?
ის უპასუხებს: სადაც უფრო ცხარე ომია!
ვიბორგი, ბუგის ნაპირები, გომელის ქარი
იცნობს ჯახუას, ვისაც მედგრად და უანგაროდ
ბრძოლის ქარბუქში, ცეცხლში, წყალში წითელი ჯარი
რომ მიყვებოდეს თავგანწირვით - მზადაა მარად.
იჟლიტებოდეს ასაკლებად მოსული მტერი,
მკაცრი პასუხი მეომარის მზადაა მისთვის:
არ გაგახარებთ ჩვენთა მამათ და ბედნიერი
დედების, დების და შვილების გამწარებისთვის!
[1943]