[ციკლიდან „ეპოქა“]

იმიტომ ხდება რევოლუცია
და დაგრიალებს მსოფლიოს თავზე,
ჯვარედინებზე მყოფი პოეტი
ახალ სიცოცხლით შეიქმნეს სავსე.
იმიტომ ხდება რევოლუცია,
რომ მოიტანოს დიადი რწმენა,
გვჯეროდეს საქმე და სიხარული,
აღფრთოვანება და აღმაფრენა!
იმიტომ ხდება რევოლუცია,
მისთვის გაისმის ტყვიის ზუზუნი,
რომ პოეტების არ გაისმოდეს
უიმედობა, კვნესა, წუწუნი!
სასოწარკვეთა, უსასოობა,
ძველ ხანას ჩვენთვის რომ მოუცია,
უნდა გადიწვას და აღიგავოს,
ამიტომ ხდება რევოლუცია!
პოეტი, ახლა გამდგარი განზე,
დროგადასული და მოხუცია,
უნდა შეერთო მასობრივ ტალღებს,
ამიტომ ხდება რევოლუცია!

[1928]