ახვლედიანი ოთარ - გალაკტიონს - 1
სალამი პატივცემულ გალაკტიონ ბიძიას!
უპირველეს ყოვლისა, გისურვებთ ჯანმრთელობასა და ხანგრძლივ სიცოცხლეს თქვენი ოჯახობით. გალაკტიონ ბიძია, მე ვიმყოფები ქ. რუსთავის ლაგერში. მისჯილი მაქვს ორი წელი პასპორტის დაკარგვაზე. ვარ უკიდურეს მდგომარეობაში. და გთხოვთ უმორჩილესათ, მე რომ მოგეცით დედას ნაწერები, თუ დაიბეჭდა, გთხოვთ, ცოტაოდენი გროში, მე გამოვგზავნი კაცს აქედან და გამოატანოთ. და თუ არ დაბეჭდილა, მაშინ გთხოვთ, ლექსები გამოატანოთ. აქ მითხრა ერთმა კაცმა, მე ვიყიდიო. მე თქვენ ამას რომ გწერავთ, ეგ ჩემთვის არის სიკვდილი. მაგრამ, აბა, რა ვუყო მე, უბედურმა, უპატრონო და ობოლმა პატიმარმა, რომელსაც არავინ გამაჩნია. თორემ თქვენ როგორ შეგაწუხებდით. განვიცდი შიმშილსა და აუტანელ პირობებს. ამისათვის გთხოვთ, გალაკტიონ ბიძია, თქვენ, როგორც ჩვენი ოჯახის ახლობელს, განსვენებულ დედაჩემის, მწერალ დარია ახვლედიანის მეგობარსა და ამხანაგს, შეხვიდეთ ჩემს მდგომარეობაში და გამიწიოთ დახმარება. თბილისიდან რუსთავამდე არის ერთი საათის სავალი. ლაგერი სადგურთან ახლოს არის. გთხოვთ, პასუხი მომწეროთ წერილის მიღებისთანავე. ჩემი მისამართია: ქ. რუსთავი, ს. ყ. 123/02 „ა“. ოთარი გიორგის ძე ახვლედიანი.
გთხოვთ, პასუხი ჩქარა მომწეროთ. იმედი მაქვს, დედაჩემის პატივისცემით მაინც მომაქცევთ ყურადღებას.
დიდი ბოდიშით ოთარ ახვლედიანი
1/IV-50 წელი
პასუხს ველი.