დღიური-630-1 - უთარიღო
მუშაობა, მუშაობა, გალაკტიონ! [არაფრად არ ღირს შენი ცხოვრება, თუ შენ არ იქმენი მილიარდერი. შენ გიხსნის შენი მომავალი წიგნი, რომელიც ათასობით უნდა დაიბეჭდოს და გასაღდეს, სხვა მხრით შენი ხსნა წარმოუდგენელია. შენ გიხსნის] შეხედე, როგორ სურთ შენი დაღუპვა. არავის არ გამოსჩენია იმდენი მტერი, რამდენიც შენ, [მაგრამ არავინ] რადგან არავინ ისე ძლიერი და ორიგინალური არ არის, როგორც შენ... ო, ეს საშინელი წლები! უნიჭოთა ხროვამ მრავალჯერ დაგიპირა განადგურება მას შემდეგ, რაც სამშობლოში დაბრუნდი. საბრალო მენესტრელისთვის, ფლობერისა არ იყოს, დღეს არსად ადგილი არ არის. ამაოდ გაიარე შენ ქარიშხლიანი ღამე. შენ მიდიოდი საბრძოლველად და პროჟეკტორის შუქი აპობდა ღრუბელს. ღამის მოღუშული ჩრდილები იწვენ სასახლეებზე, და შორს ისმოდა გრიალი ზარბაზნებისა. სადღაცა შორს სისხლში გასვრილმა ჯარისკაცმა თოფის ლულაზე ააფრიალა თეთრი ჩვარი, გაისმა ურა, მარსელჲეზა, ინტერნაციონალი. ისევ სალჲუტი! და აი, ამ საერთო სიხარულში...
გალაკტიონი. სრულიადაც არ მაინტერესებს.