იდიდე, სამშობლოვ, იდიდე!
დრო საახალწლოს უმატებს სრბოლას,
გასწი! არ მინდა სიცოცხლე მშვიდი,
იმ კორიანტელს, იმ ცეცხლს, იმ სროლას,
მოშორდა ცხრაას ორმოცდაშვიდი!
დიდი სახლები დიდ ქალაქების
აღარა ჰგვანან ნამინანქრევებს,
სახე ნაგების და ასაგების -
სტოვებენ ომის დროის ნანგრევებს.
გასწი, არ მინდა სიცოცხლე ძველი,
სადაც არც ეზო, არც კარებია,
სახე წაშლია, რასაც კი ცელი
ცეცხლისა ცეცხლით გაჰკარებია!
[1948 წლის იანვარი]