დღიური-636-8 - უთარიღო
ალმა-ატაში გლეხმა პირველად დაინახა მატარებელი
თითქო ყურები დიდხანს დაბუგული ჰქონდა; ეხლა გაეხსნა და მან გაოცებით მიუგდო ყური მის გარეშემო უეცრად დატრიალებულ ფუსფუსს, გუგუნსა და ხმაურობას. იგი უღიმის მას ბავშური გულწრფელი გაღიმებით. აი, პატარა უზბეკელი ბავშებიც. ისინი სტვენენ, ყვირიან, ხმაურობენ მატარებლის დანახვაზე; ისინი ნახულობენ ამ ახალ სანახაობაში უამრავ წყაროებს აუწერელი სიამოვნებისათვის.
მათ აბრუებს თანაბარი, რიტმიული გუგუნი, ერთი და იმავე [ტონისა] ბორბლების ჯერჯერობით მათ არ გაუგონიათ, რომ შესაძლებელია; სწორედ ასეთივე სიამოვნება თანაბარი სიმების დაედო საფუძვლად მუსიკას, მის რიტმს.
ძლიერი და გამყინავი სტვენა ორთქლმავალისა უეცრად აყრუებს ყველას; უცებ ყველანი ყურებს თითებით იცავენ, მაგრამ მალე გაისმის ერთხმოვანი ხარხარი. „ეს რა აშარი რამ ყოფილა“ - სიამოვნებით ფიქრობენ ისინი, ალბად.. მატარებელმა საზარლად დაიქშინა, ესეც არანაკლებ საოცარი.
ორთქლმავალმა ნელა დაიხია და დაეჯახა წინა რონოდას. რიტმიულადვე ნელა დაჯახება გაიმეორეს ერთმა მეორეზე [ყველა] რონოდების მთელმა შემადგენლობამ. ესეც არანაკლებ ახალი ამბავია.
იყო უზბეკისტანი, იყო თურქესტანი, საუკუნოებით დავიწყებული, თვითმპყრობელობით დამონებული ერები, მის მიერ „დაბალ რასსად“ წოდებული თურქესტანი. მხარე ეწეოდა უმთავრესად ბამბის მოყვანას, მებაღეობას, მატყლი, ტყავეულობა და სხვ. შეადგენდა მის საარსებო წარმოებას. მაგრამ ყოველივე ეს კერძი იყო ემირის და მეფის დამქაშების, სოფლის მსხვილი მემამულეების, ქალაქელი ვაჭრების და მოლების. კიშლაკებსა და აულებს ეპატრონებოდენ ბაები, მანანები, მულები. მხარის მთელი მოსავალი მათს საკუთრებას შეადგენდა. „ეს ჩემია“ - [გაიძახოდნენ ისინი, ესეც შენია] გაიძახოდა ბაი, ჩემი კერძო საკუთრებაა წინაპართაგან ჩემზე გადმოსული ქონებაა, ან ჩემი საკუთარი ფულით ნაყიდია. იგი არასდროს არ იტყოდა, რომ მთელ ამ უზარმაზარ სივრცეს მიწებისას ამუშავებს არა ის, არამედ დეხვანების, მოჯამაგირეების და მუშების მიერ. არა, მას ძვალლბილში ჰქონდა გამჯდარი კერძო მესაკუთრის გრძნობა და განა მარტო მას? სიტყვებს „ჩემი“ და „შენის“ არა მარტო უზბეკისტანსა და თურქესტანში [ჰქონდა] ეძლეოდა უზარმაზარი მნიშვნელობა, არამედ გადაიქცა მთელი მსოფლიოს ისტორიად, დამონებულთა და დამმონებელთა ისტორიად, კაპიტალისტური ხანის ისტორიად. „წაართვით [კაცობრიობას] უზბეკისტანს კერძო საკუთრების იდეია, - გაიძახოდა [ბურჟუაზია] ბაი - წაართვით [კაცობრიობას] მას ეს იდეია და მთელი ხლართი საზოგადოებრივობისა გადავარდება საზიზღროებაში; შეეცადეთ, განახორციელოთ კომუნიზმის უტოპია და [ადამიანები] უზბეკელები, რომელთაც პატივსა სცემენ და უყვართ ერთმანეთი, გადაიქცევიან მგლების ხროვად, რომლებიც ერთმანეთს დაგლეჯენ. გასისხლიანებული მსხვერპლის დასასაკუთრებლად“. წარმოიდგინეთ! თურმე ასე მოხდება! მაგრამ აღმოჩნდა სულ სხვა რამე. სწორედ ამ კომუნიზმის უტოპიამ საბოლოოდ შეარყია კერძო საკუთრების მრავალი საუკუნის მუდმივი კანონები, რომელსაც ბურჟუაზია „ბუნების კანონად“ სთვლიდა. თითქო უუძველეს ხანაში უზბეკელი ვერავითარ განსხვავებას ვერ ხედავდა სიტყვებში: „შევიძინე“ და „იქურდე“, დახეტიალობდა რა თავის მწირ ხრიოკებში.