დღიური-631-8 - უთარიღო
ჯგუფმა პირველი ტური წააგო. ოლგა იურევნა იძულებული იყო - სკანდალურად გაქცეულიყო ჩემი ბინიდან. და მასზე დაყრდნობილნი (ი. აბაშიძე და სხვ.) პირში ჩალაგამოვლებულები დარჩენ. საჭირო იყო სხვა გზას დასდგომოდენ.
მთაწმინდაზე, ბესიკის მოედანთან სცხოვრობს ნინო, რომელიც ხმას ავრცელებს, რომ ჩემი „მერი“ დაწერილია მასზე (ამაზე შორს ხულიგნობა ვერ წავა). ამ გარემოებას ჩაავლეს მათ ხელი და მოსთხოვეს, შემოჭრილიყო იგი ჩემს ბინაში ჩემთან საცხოვრებლად. ავანტიურისტმა ქალმა ეს მოახერხა. ის პირდაპირ შემოიჭრა ჩემთან და ვერას გზით შემდეგ ვერ მოვიცილე. მას გაუკეთებია ათი აბორტი, ჰყავს ქალ-ვაჟი: დუთუ და ნუნუ. ორივე თავზე მე მომახვია. დუთუმ ჩემი სადილის წიგნაკი წაიღო და მით სარგებლობს სამი წელიწადი, ნუნუ კიდევ სულ ჩვენთანაა სადილ-ვახშმად და ლუკმას მგლეჯს პირიდან. ეგ კიდევ არაფერი. სახლი სულ დააცალიერეს: რა ფეხსაცმელები, საცვლები, კოსტიუმები და უამრავი სხვა რამ წვრილმანი ჩემის სახლიდან გალალეს. ჩემის სახელით ნინას ძმას მიწა აუღია და ამუშავებს - ბაღდადში.. აკადემიიდან წამოღებულ „პაიოკს“ ჯერ თავის სახლში წაიღებს და საღამოთი ჩემთან მოვა... საბანი და ბევრი სხვა რამ თავის ბინაში გადაუტანია ჩემი ავადმყოფობის დროს. არ ვიცი, როგორ შემეძლება ჩამოვთვალო ყოველივე, რა სისაძაგლესაც ეს ქალი სჩადის. გაიძახის, რომ დიდი სიყვარულის გამო მოვიდა ჩემთან, ნამდვილად კი სინდისზე ხელაღებული, ნამუსგარეცხილი, ყოვლად უსირცხვილო ადამიანია. საიდან ვიცი, რომ იგი მოგზავნილია ჯგუფის მიერ?
1. პოლ.
*
აგე ხე რომ სდგას - ხომ ხეა მხოლოდ,
[ხომ მხოლოდ ხეა, სხვა არაფერი]
ფოთოლიც მხოლოდ ხომ ფოთოლია.
*
მოსკოვს, კიევსა და სევასტოპოლს
სხვაგვარად ნახავს,
თვალი შეჰხარის ცისფერ ფერადებს,
ავტობუსს ახალს.
ახალი სახე
სხვა მზე ანათებს [მსოფლიო] დღეიდან გლობუსს
[ცა არის ლილის]
[ფერადი] წინ ქუჩაც ნოხის,
[ცისფერ ავტობუსს, ახალ ავტობუსს]
მიმქრალ პალმებს, დროშებს, ავტობუსს,
ცხრა მაისს, [თბილისს] სოხუმს.
[ნახეთ, გათავდა თუ არა ომი,
რაღაც იწყება]
ომი, გათავდა თუ არა, ნახე
ფერისცვალება,
ქალაქს ეძლევა ახალი სახე
და [მოსიცხება] ბრწყინვალება!