ახვლედიანი ოთარ - გალაკტიონს - 3
სალამი საყვარელ პატივცემულ გალაკტიონ ბიძიას!
უპირველეს ყოვლისა, გისურვებთ ჯანმრთელობასა და ხანგრძლივ სიცოცხლეს თქვენი ოჯახითა და მოკეთეებით.
გალაკტიონ ბიძია, მივიღე თქვენგან გამოგზავნილი დედას ნაწილი ლექსებისა და ასოცდახუთი მანეთი, რამაც ძალიან გამახარა და რაზედაც მოგახსენებთ უღრმეს მადლობას. პირდაპირ ეს იყო დახსნა ჩემთვის. გალაკტიონ ბიძია, რასაკვირველია, შეიძლება თქვენ თქვათ, როგორ გამიჭირვა საქმეო, მაგრამ რა ვქნა, ხომ იცით, თქვენს მეტი ყურადღების მომქცევი არავინა მყავს. გალაკტიონ ბიძია, ეხლა მე თქვენა გთხოვთ უკანასკნელათ ამას: თქვენ გექნებათ რაიმე თქვენი ძველი შარვალ-ხალათი ან ფეხსაცმელი თქვენი ნაცვამი, რომელიც არ გამოგადგებათ, გთხოვთ, გამოატანოთ ამ წერილის მომტანს, თორემ სულ დაკონკილი დავდივარ. ეხ, რა ვუყოთ, იყო დრო, როცა მეც მქონდა სახლ-კარი, მეც მყავდა მშობლები და ეხლა რა ვქნა, ესე მიმტყუნა ბედმა. რას იზამ, ესე ყოფილა ბუნების წესი, ერთი უნდა გაბედნიერდეს, მეორე კი დაეცეს, გაუბედურდეს და ამ უბედურებაში მეც მოვყევი; მაგრამ აღარ მგონია, დიდხანს გავსტანო ამ უბედურებაში. მე მგონი, ჩემსკენაც გადმოანათებს მზე თავის მოკისკასე სხივებს. გალაკტიონ ბიძია, აბა, თქვენ იცით, თუ შემისრულებთ ამ უკანასკნელ თხოვნას, თქვენი მეგობრისა და მწერალ დარია ახვლედიანის შვილისათვის თუ გაიღებ მოწყალებას.
ძალიან გაჭირვებას განვიცდი მატერიალურათ. აბა, მეტს არაფერსა გწერთ.
მე ვატყოფ, თავი შეგაწყინეთ. ველი პასუხს ამ წერილის მომტანის ხელით. იმედი მაქვს, ჩემს თხოვნას არ დატოვებთ უშედეგოთ და დამეხმარებით შეძლებისდაგვარათ.
დიდი ბოდიშით დარიკო ახვლედიანის შვილი
ოთარ გიორგის ძე ახვლედიანი
15/IX-51 წელი
ჩემი მისამართია: ქ. რუსთავი, ლ. კ. ს. ყ. 123/02 „А“.
გალაკტიონის ხელნაწერი:
ხელწერილი
მივიღე ოთარ ახვლედიანის გადასაცემად დარიკო ახვლედიანის ყველა ნაწერები და ხელნაწერები - გ. ტაბიძისგან. Г. А. 2 სეკტ. 1951.