[იოველი]
ისინი ერთობოდენ წარსულის მოგონებებით (რა წარსული უნდა ჰქონოდათ ამ ახალგაზრდებს?), სანტიმენტალური გულგახსნილობით. ერთი შეხედვით ისე იყო, თითქო არაფერი ერთმანეთში დაფარული არა ჰქონდათ რა. ყველას ხიბლავდა ევას ნაზი და მელოდიური ხმა. ეს ხმა მას აგონებდა მთაწმინდის წკრიალა ზარს, აღდგომის წინა დღეებში დარეკილს, იოველს დღესაც ვერ გამოურკვევია, რად განიცდიდა უცნაურ შიშს, როცა ხედავდა ევას თვალებში, ღრმა, უფსკრულივით შავ თვალებში გამკრთალ ნაპერწკლებს. როცა ეს თვალები თითქო განგმირვას ლამობდენ მისი თვალებისას, სწვავდენ მის სულს, იხედებოდენ გულის სიღრმეში. ევას მუდამ გარს ერტყა თაყვანისმცემელთა მთელი გუნდი, მაგრამ ვერც ერთ თაყვანისმცემელთაგანს ვერ გაებედა, ეთქვა რამე უწესო და უზრდელი სიტყვა ევასთვის.. ისინი მხოლოდ იკრიბებოდენ მასთან. არასდროს არ დაავიწყდება იოველს ზაფხულის ერთი საღამო. ჩვეულებრივად აივანზე ისხდენ. ახალგაზრდობა ლაზღანდარობდა და ევას აჯავრებდა:
ევას თვალი აქვს
როგორც მაყვალი,
მაგრამ ლოყაზე
არ შვენის ხალი.
ევას ტანისაც
არ შვენის რხევა,
მახინჯი ევა,
მახინჯი ევა!
ვითომდა გულმოსული ევა ხან ერთს გადაჰკრავდა მარაოს ყბაში, ხან მეორეს. იოველს არასდროს ასე ხალისიანი არ ახსოვდა ევა ბავშვობის დროიდან. ოჰ, ეს ბავშვობა..
მაშინ ევას ლბილი, ბრწყინვალე თმა ჰქონდა, შუაზე სათუთად გადავარცხნილი, მის თვალებსაც უფრო ლბილი სინათლე ჰქონდა. ნათელი, ფერმკრთალი სახე პატარა პირით. მისი თვალებიდან იფრქვევოდა გაუბედავი სევდიანი სინაზე. მას ჰქონდა წყნარი, ალერსიანი მოძრაობა, მშვიდი ღიმილი და მთელი მისი არსებიდან ჰქროდა მომჯადოებელი სიყმაწვილის სიცოცხლე და ელვარება. იოველის მთელი მოგონებები ევაზე ქალაქის ცხოვრებასთანაა დამოკიდებული. იოველს ახსოვს ევას მამა, დიდი, ძლიერი, ხმა-მაღალი სიტყვა-პასუხისა და ჩქარი მოძრაობის კაცი. იგი ძლიერ ხშირად ხუმრობდა მათთან, იოველსა და ევასთან. როდესაც პატარა ევა მის ჭაღარა შერეულ წვერებს ჩააფრინდებოდა, მამა ყვიროდა: მიშველე, მიშველე, იოველ. იოველი იცინოდა. „თქვენ ორივენი ბავშვები ხართ“ - იტყოდა შემდეგ ევას მამა. კიდევ ერთი პატარა გარემოება. ევას მამას რაღაც განგებით საოცრად წააგავდა იოველის მამა, და ორივენი მეზობლად სცხოვრობდენ. თენგიზს ეჭირა დიდი ბინა, რომელიც სასახლეს წააგავდა. იოველს არასგზით არ შეეძლო გამოეთვალა, თუ რამდენი იყო ეს ოთახები, დარჩა მხოლოდ სიმრავლის შთაბეჭდილება. სულ ზედმეტი, არა-საჭირო ოთახები იყო. ანდა თუ იყო საჭირო, მხოლოდ მისთვის, რომ იოველს თავისუფლად ერბინა მათში, მაგრამ განსაკუთრებით ეს სახლი მითი იყო შესანიშნავი, რომ შიგ ყოველ-დღე რაღაცას დღესასწაულობდენ, სჭამდენ და სვამდენ. ხან საუზმე, ხან სადილი, ხან ჩაი, ხან შოკოლადი ან ხილი.
*
...გვენახა ერთმანეთი. გადავდიოდი ევასთან და დიდხანს არ მსურდა ამ სახლიდან წასვლა, სანამ ერთი ჩვენი მრავალი მოსამსახურეთაგანი არ მომიკითხავდა. ო, ეს მოსამსახურეები, „კაძახები“, როგორც ეძახდა მამაჩემი! ძალიან ბევრი იყვენ ისინი. ყოველ წამში ფუსფუსებდენ, დარბოდენ კიბეებზე ხან ზევით, ხან ქვევით. ერთი მათგანი ყოველთვის კარებთან იყო [გაჩერებული] ჩამომჯდარი. „სულელი კაძახი“. როდესაც იგი ჩემს წასაყვანად მოვიდოდა, ევა მოწყენილად შეხედავდა ჯერ მას, მერე მას და იტყოდა:
- ჯერ ადრეა, ჯერ მოიცადოს!
- იმე! რას გააკეთებს, ბატონო?
- ჩვენ არაფერს არ ვაფუჭებთ, ჩვენ ვთამაშობთ.
- ჩვენ არაფერს ვაფუჭებთ, ჩვენ ვთამაშობთ.
- რავა გეკადრება, მაგას ხვალეც მეესწრებით! - იტყოდა სულელი კაძახი, და ამისვამდა მხრებზე და სახლისკენ გამაქანებდა... მაშინ ევა მხიარულად გადაიკისკისებდა და ფეხებში მტაცებდა ხელს...
ყველაფერი ეს უეცრად მომაგონდა იმ საღამოს და მწუხარებით ამევსო გული: მას შემდეგ ყველაფერი გამოიცვალა: ჩვენი ადგილ-მამული და სასახლე მევალეებმა შეირჩინეს, ჩემი დედ-მამა უკვე ცოცხლები აღარ იყვენ და სავსებით დაქალებული ევა უკვე კნეინა იყო. ყველაფერი ეს მოხდა ჩემი რუსეთში ყოფნის დროს და გული [მეტკინა] მწარედ მტკივოდა, როცა სამშობლოში დავბრუნდი, რა მოხდა?
[1930-იანი წლები]