კავკასიონის კლდეებზე
კავკასიონის კლდეებზე
მეომარი სდგას მზიანი,
თავდადებული მებრძოლი,
ომში არალერსიანი.
გუშინ როს კავკასიონთან
მტერი მოვარდა ხმიანი,
მან მიაგება მახვილი
მკაცრი და განგებიანი.
ეკვეთა ურდოს ლომებრივ
ძვრით ნახტომ-ანაზდიანი,
სამშობლოსათვის დევგმირთა
რისხვა ქარიშხალფრთიანი.
დაჰფარა ლესელიძისა
ხმამ ადგილები მთიანი:
„ჩვენ მიწა-წყალზე დუშმანი
ვერ გაიხარებს გვიანი“.
მტერმა მთას თავისუფალსა
ვერ მიაყენა ზიანი,
მშვენიერია ყაზბეგი,
ლაღი და ოცნებიანი.
მას მარად მედგრად იცავდა
უანგარო და სვიანი,
იგივ მძლე, იგივ ამაყი,
მებრძოლი ადამიანი!
1942