ორახელაშვილი გრიგოლ - გალაკტიონს - 1
პატ. გალაქტიონ!
გადავწყვიტე, რემენგტონზე არ დავბეჭდო დამუშავებული თემები, სანამ ხელნაწერს საბოლოვოდ არ გავასწორებ და დავადგენ, ვინაიდან ხარჯს მოითხოვს. მე მინდოდა თემები: სოც. ინდუსტრიალიზაცია, კულტ. რევოლუცია და სოფ. მეურნ. კოლექტივიზაცია ერთად მომეტანა, მაგრამ მეორე აზრმა მიკარნახა: ეგებო ინდუსტრიალიზაციაში ზედმეტი რამე გამეპარა, რომლის მომდევნო თემებში გადატანა შეიძლება ან დაშვებული შეცდომის გასწორება. ამიტომ მოგიტანე წასაკითხავათ, რომ თქვენი აზრი გავიგო და რჩევა-დარიგება მივიღო.
თქვენი ბიოგრაფიული ელემენტები 1925 წლიდან 1933 წლამდე ინდუსტრიალიზაციაში გამოყენებულია, რასაც ეს თემა საჭიროებდა. დანარჩენი ბიოგრაფიული ელემენტები 1925 წლიდან 1933 წლამდე მოთავსებული იქნება კულტურულ რევოლუციაში და სოფლის მეურნ. კოლექტივიზაციაში ამ თემების შესაფერისი მოთხოვნილების მიხედვით ისე, რომ მათ შორის დამთხვევები და აზრიანი წინააღმდეგობები არ მოხდება. მე მგონია, ინდუსტრიალიზაცია დიდად გაჭიმული არ უნდა იყოს. მე მომწონს და რა ვიცი. საინტერესოა თქვენი აზრი.
თქვენი პატივისმცემელი: გრ. ორახელაშვილი
1949. 25. V