დღიური-628-23 - უთარიღო
პლანი რომანისათვის.
1. სარაჯიშვილის სიმღერა.
ქარი
სიყვარული ქარისადმი.
1. მას უყვარდა ბაღში ხეტიალი შემოდგომის ქარიან დღეში: უზომო სიამოვნებას ჰგვრის თვითონ ქარი, რომელიც ახმაურებს ხმელ ხის ტოტებს, ყვითელ ზვინებად მიგორებულ ფოთლებს, ბაღის ბილიკებიდან სძრავს გრავიების ყვითელ კენჭებს, ეხვევა თვითონ მას, წინააღმდეგობას უწევდა - და ის გარემოება, რომ წინააღმდეგობას უწევდა - სიხარულის გრძნობით ავსებდა მის გულს.
2. მას უყვარს სიარული ქარში, ჩალის [სიმინდებში] ღერებში, რომლებიც სალამურებივით სტვენენ ქარიან ამინდში. ამ დროს მას აგონდებოდა მისი სიყმაწვილე.
3. უყვარს გემის ბაქანზე დგომა, როდესაც ქარია და ზღვა ღრიალებს.
4. უყვარს ქარი, როდესაც ტრამვაის ან ავტომობილის ბაქანზე მდგომს იგი ეალერსება, უშლიდა თმას, სახეში სცემდა. ეს იყო უვნებლობის გრძნობა.
5. უყვარს ქარი, როდესაც უეცრად იგი დააღებს ოთახის კარებს. "მიხურეთ!" - შეიქმნება ძახილი. ეფარებიან სანთელს, რომ იგი არ ჩაჰქრეს.
6. უყვარს ქარი, რომელიც შეარხევს ფანჯარას, შემოაღებს და შემოჰყრის გაზაფხულის ხეხილების ყვავილებს; იგი შუბლს მიუშვერდა მას. ისევ სიყმაწვილეს იგონებდა ამ დროს.
7. უყვარს ქარი: ქარი ხან ლაჟვარდ ვუალსა ჰგავს, ხან მშვენიერ მოწმენდილ ცას, ხან გაუხაზავ წმინდა სარკეს. ხან მსუბუქზე უმსუბუქეს ღრუბელს, მყინვარის კალთებზე რომ შერჩება. ქარი გოტიეს დაწმენდილი ლექსებია, ქარი ღვთაებრივი კომედიაა, ქარი იტალიანური ვოლტორნის წკრიალია. ქარი ის მშვენიერი ელეგიაა, ის ერთად ერთი ძველებური სიმღერა, რომელსაც მღეროდა ილია ჭავჭავაძე: „სული შფოთავს და გულიც... გულიც აღარ მშვიდდება... თვალს ავახელ და ცრემლი, ცრემლები არ მშორდება. დამრჩენია მხოლოდ ერთი, ერთად ერთი იმედი“ და სხვ.
8. „გასწი“ დაუძახებდა მეეტლეს - ქარში.
9. „გაჰკვეთე ქარი, გააპე წყალი“ - ჩუმად იმეორებდა ის ცხენზე მჯდომარე.
10. ქარი - სიმბოლო იყო - მისი წყურვილისა, რომ გამოცოცხლებულიყო მთელი მისი არსება, მთელი მისი შეგნება. ქარი - რომელიც დასძრავდა სიცხისაგან შეხუთულ ჰაერს, ქარი, რომელიც ააღელვებდა უმოძრაოდ მყოფ ტყეს – დასიცხულს. ქარი წყურვილის მომკვლელი, როგორც ანკარა წყალი უდაბნოში.
11. ქარში ამ დროს რაღაცგვარად თავისუფლდებოდა სული: ისე, როგორც მრავალხალხიან სარდაფიდან ამოსვლა - ჰაერზე. გახურებულ სახეს მარაოთი რომ იგრილებს ქალი. ცივ სარკმლის მინას რომ მიეყრდნობი მხურვალე შუბლით.
12. ნერვები ამ დროს წყნარდებოდენ.
13. „კოჯრის ნიავი შუბლსა განგვიგრილებდეს“.
14. სამხედრო გზიდან მოდის ხან და ხან ქარი.
15. ტფილისი - ფანტასტიურად მწყურვალეა ქარისა ზაფხულში, მის სიცხე-პაპანაქებაში. განსაკუთრებით ვერის დაღმართი.
16. ვერის ხიდზე იცის ისეთი ქარი, როგორიც არსად მთელ ტფილისში, გარდა მახათის მთისა. იგი დიდხანს იდგა საღამო ხანს ვერის ხიდზე.
17. ქარი ყველაზე უფრო სასიამოვნოა, როდესაც ჰაეროპლანით მიჰქრიხარ. ან ადიხარ ფუნიკულიორზე.