დღიური-628-16 - უთარიღო
უფრო ხმამაღლა! [ვინ].
ვანლერ დაისელი: „ბალლადა ტფილისთან დაღუპულ ვეფხვზე“.
ამ წიგნში დასაფასებელია: 1. პოეტის მისწრაფება წიგნის ლამაზად გამოცემისთვის, ყდის შერჩევა. 2. გულწრფელობა. 3. ზრდილობა. 4. პატიოსნება, რაც ასე სანთლით საძებარია თანამედროვე პოეტებში. 5. სიახლისადმი მისწრაფება ძველი ფორმებით. 6. საუკეთესო ლიტერატურული ტრადიციებისადმი პატივისცემა. 7. ენერგიული ფორმები. 8. ემჩნევა კონდენსაცია, ეკონომია სიტყვის - რაც ასე ნაკლებ ჰქონდა წინანდელ წიგნებში (ამ წიგნში შედარებით დიდი ნაბიჯია ამ მხრით წინ წადგმული). 9. საერთოდ ემჩნევა წინსვლა, რაც უნდა მიეწეროს ავტორის ენერგიულ მუშაობას და გამოცდილებათა თანდათანი დაგროვების შესაფერისად გამოყენებას. 10. მრავალი ადგილებია პირდაპირ კლასიკური: „ვეფხვი იწვა ნამგზავრი, ათრთოლებულ ტორებით, გადაწია ლერწამი, ჩაიხედა ჭალაში; სად დატოვა ოჯახი, ვეფხვთა ტკბილი ჯალაბი, სამშობლო ინდოეთი, მთები და მინდორები“. 11. მოცემულია ვეფხვის ძირითადი ხასიათი: სიდიადე. 12. მოცემულია ადგილი ვეფხვის მოქმედებათა: სიმხურვალე. 13. მოცემულია ადგილი ლიტერატურიდან ვეფხვთა შესახებ - განსაკუთრებით აღმოსავლეთის ლიტერატურიდან. 14. ლექსი მსუბუქია და მოქნილი. ავტორს ემარჯვება ალაგალაგ შედარებები...
დეფეკტები: 1. რითმები [თითქმის ყოველთვის] (გამონაკლისები არის) მეტისმეტად ზერელეა. შეიძლება პოეტი განგებ სჩადის ამას? (შეუძლებელია, მას არ ჰქონდეს რითმის კულტურა)... მაშინ დაუშვებელია. შეიძლება გამოუცდელობით მოსდის: საქმეზე - მაქეზებს, არეზე - ქარვებზე, გაშლიდეს - ხმაშივე. ასსონანსი სახიფათო რამეა: დიდი სიფრთხილეა აქ საჭირო. არ შეიძლება მეტისმეტად თავზეხელაღება ამ მხრით (გრანელის მაგალითი). ასსონანსი ცუდათ დამკვიდრდა რაღაცნაირად ჩვენში. სიადვილე - არ არის ასსონანსი. ცუდათ ხმარობენ ასსონანსებს გრანელი, კ. ლორთქიფანიძე, მაშაშვილი, ჟურული, ჩიქოვანი, ტიციან ტაბიძე, პაოლო იაშვილი. დეფეკტად უნდა ჩაითვალოს ახალი სიტყვების უხეიროდ შექმნა: [პოლიტიკური] ორსკამზე ჯდომა, რაც ნათლად სჩანს და სხვ. ეს ყველაფერი თეთრი ძაფებით შეკერილი პოლიტიკაა.. მაგრამ საბოლოო ანგარიშში უსათუოდ - კონტრრევოლიუციონურია
[ტრანშეებში]
[არ ბრწყინვალებ, არ ენთები
ღამევ ბნელო].
არ ბრწყინვალებ, არ ენთები.
გათენდი თუ გათენდები.
ჭაობია.
რა უშლის ხელს, ახალგაზრდა, ნიჭიერი [მწერალი] პოეტი რომ პირნათლად ემსახუროს - დიდს იდეას - საქვეყნო იდეას.
1. რუტინა: ხელოვნება ხელოვნებისათვის. 2. მოსისინე პოლიტიკური ჯგუფები: 1. ა. ეს ხომ ქართული არ არის? ბ. საქართველოში ხელოვნება არ არსებობს. 2. განგაში - ატეხილი [იმის გამო] თუ ლიტერატურული ნაწარმოები სოციალისტურ ტემებს ეხება. 3. პროპაგანდა იმ მწერლების წინააღმდეგ, რომლებიც ცდილობენ ჭაობიდან თავის დახწევას, 4. პროვოკაციული გამოსვლები ამ გზით, 5. ჭორი, ენატანიობა, 6. არაგულწრფელად შესვლა ნდობაში იმ მიზნით, რომ გულწრფელებს გზა გადაუჭრან. 7. ...